ភ្នំពេញ៖ គណបក្សមួយចំនួនបានសរសេរលិខិតចូលរួមរំលែកទុក្ខជូនដល់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងនាយករដ្ឋមន្ត្រីកម្ពុជា សម្តេចតេជោ ហ៊ុន សែន ចំពោះមរណភាព លោកស្រី ប៊ុន សុថា ដែលត្រូវជាប្អូនពៅបង្កើតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

ប្រធានគណបក្សភ្លើងទៀន ទាវ វណ្ណុល នៅថ្ងៃទី០៤ ខែកុម្ភៈ ឆ្នាំ២០២៣ បានផ្ញើសាររំលែកមរណទុក្ខដ៏សែនក្រៀមក្រំជាមួយសម្តេចកិត្តិព្រឹទ្ធបណ្ឌិត និងក្រុមគ្រួសារសព និងសូមឧទ្ទិសបួងសួងសូមឱ្យវិញ្ញាណក្ខន្ធរបស់លោកស្រី ប៊ុន សុថា បានទៅកាន់សុគិតភពកុំបីឃ្លៀងឃ្លាតឡើយ។

ប្រធានគណបក្សភ្លើងទៀនបានចាត់ទុកការបាត់បង់ប្អូនស្រីជាទីគោរពស្រឡាញ់របស់សម្តេចកិត្តិព្រឹទ្ធបណ្ឌិត គឺជាការបាត់បាត់ភរិយា មាតា មាតាក្មេក និងជីដូនប្រកបដោយព្រហ្មវិហារធម៌នៃគ្រួសារសព។

នៅថ្ងៃទី០៥ ខែកុម្ភៈ ឆ្នាំ២០២៣ ប្រធានគណបក្សចំនួន២ទៀត គឺប្រធានគណបក្សយុវជនកម្ពុជា និងប្រធានគណបក្សសញ្ជាតិកម្ពុជា បានសរសេរលិខិតចូលរួមមរណទុក្ខជូនដល់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងនាយករដ្ឋមន្ត្រីកម្ពុជា សម្តេចតេជោ ហ៊ុន សែន។

ប្រធានគណបក្សយុវជនកម្ពុជា លោក ពេជ្រ ស្រស់ បានសរសេរក្នុងលិខិតរំលែកទុក្ខដូច្នេះថា៖ «យើងខ្ញុំទាំងអស់គ្នា សូមចូលរួមរំលែកទុក្ខដ៏ក្រៀមក្រំនេះជាមួយសម្ដេចតេជោ យ៉ាងក្រៀមក្រំបំផុត សូម សម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារសព មេត្តាទទួលការ ចូលរួមរំលែកទុក្ខពីយើងខ្ញុំដោយក្តីគោរពបំផុត»។

ប្រធានគណបក្សសញ្ជាតិកម្ពុជា លោក សេង សុខេង ក៏បានសរសេរលិខិតផ្ញើជូនសម្តេចទាំងទ្វេដូច្នេះថា៖ «ថ្នាក់ដឹកនាំគ្រប់លំដាប់ថ្នាក់ និងសមាជិក សមាជិកាទាំងអស់នៃគណបក្សសញ្ជាតិកម្ពុជា មានសេចក្តីសោកស្តាយ ទុក្ខក្រៀមក្រំក្រៃលែង និងសូមចូលរួមរំលែកទុក្ខនេះជាមួយសម្តេចទាំងទ្វេ និងក្រុមគ្រួសារសព លោកជំទាវ ប៊ុន សុថា ដោយសេចក្តីសង្វេក និងសេចក្តីគោរព»។

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញើលិខិតថ្លែងអំណរគុណជូនដល់សមាជិក សមាជិកានៃគណបក្សទាំង៣ ដែលបានផ្ញើលិខិតចូលរូមរំលែកទុក្ខចំពោះមរណភាពប្អូនស្រីបង្កើតជាទីស្រឡាញ់ស្មើជីវិតរបស់សម្តេចកិត្តិព្រឹទ្ធបណ្ឌិត។

សូមបញ្ជាក់ថា លោកស្រី ប៊ុន សុថា គឺជាប្អូនស្រីពៅរបស់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន បានទទួលមរណភាពនៅថ្ងៃទី៣ ខែកុម្ភៈ ឆ្នាំ២០២៣ វេលាម៉ោង ៦និង១៣នាទី ក្នុងជន្មាយុ ៦៧ឆ្នាំ ដោយរោគាពាធ។

សពលោកស្រីត្រូវបានតម្កល់ទុកធ្វើបុណ្យតាមប្រពៃណី នៅផ្ទះលេខ៦៦ ផ្លូវលេខ៥២៨ កែងផ្លូវ២៨៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ នឹងដង្ហែរទៅបញ្ចុះនៅវត្តបុទុមវតី នៅថ្ងៃទី៧ ខែកុម្ភៈ ឆ្នាំ២០២៣៕